الاثنين, أكتوبر 31, 2011
فى ذكرى ناصر أبو الأبطال
ح نقــــــول وقلنا ومهما اتقال
أجمل كــــــلام فى الحب أكيد
ح يكون شويه عليك يـا جمال
أسد العرب زيــــــــــن القادة
وزعيم بطل فــــــــوق العادة
ولازيـــــه شافت أمتنــــــــــا
ولا بعـــــده جـــــــابت ولادة
جـــــــــــوانا سيرتك محفورة
ومعانـــــا بالصوت والصورة
خطبك دروس فـــــى الوطنية
وحكـــــــم وأقوال مــــــأثورة
قمت ومعاك ضباط أحـــــرار
ع الظلم ثـــــــــورت ولستعمار
وفتحت بــــــاب الحريــــــــــة
لمصرنـــــــا وكـــــل الأقطار
أنت اللى قلت ارفـــــــع راسك
وصبحت رمـــــز بــإخلاصك
ومشيت ما بينا بـــدون حراس
كل الوطن كـــــــــان حراسك
قلت وكلامك كـــــــــــــان هو
اللى اتخد غصب وقـــــــــــوة
مـــــا يجيش برقة ولا استسلام
ولا راح يعود غير بـــــــالقوة
وقلت مصر مـــــــــا هى تكية
مش بيه وبـــــاشا وأفنديـــــة
فيه فلاحين وكمـــــــان عمال
دول يبقوا خمسين فـــى المية
أعلنت حـــــــربك ع الإقطاع
وقلبت وعـــــــدلت الأوضاع
وللغلابـــــــة فى كل مكــــان
أعــــادت حق افتكروه ضاع
أنشأت للعلم مجــــــــــــــامع
ملكت فداديـــــــــــن للزارع
ورفعت من قــــــــدر العامل
وبنيت لــه شركات ومصانع
فرضت اسمك ع الناس فرض
وفضلت نجـــــم نجوم الأرض
ورحلت وأنت مـــــــــا تملكشى
مـــن دنيتك غير قسط القرض
مين يـــــــوم رحيلك مابكاشى
داليلتها والله مــــــــــــانمناشى
وقلنــــــــا ربنا ح يعـــــــوض
بس العوض لسه مجـــــــاشى
يــــا جمال يـــــــا حبيب الملايين
ولا صاد م الحكـــــام ولا سين
عـــــاش زيك مــــن بعد مماتوا
فيه مـــــــــــاتوا وهما العايشين
فـــــــرق تسد واللى وراهــــــا
بعدك مفيش حــــــد قراهــــــــا
فـــى الفخ واقعين بمزاجنـــــــا
وف بعض نـــــــــاكل بشراهة
أمتنا لعبة فى ايــــــــــــد قاصر
وف غـــــــزة شعبنا متحــاصر
وشعوبنــــــا حنت للأحـــــــرار
وفــــــــــــى انتظار عبد الناصر
سامى النويهى
Posted in: مقالات قومية
0 comments:
إرسال تعليق